ކްލަބް މޯލްޑިވްސް އިން މިއަހަރު އަލަށް ތައާރަފްކުރި، ކްލަބް މޯލްޑިވްސް ކިޑްސަލް ރަސްމީކޮށް މިއަދު ހުޅުވައިފި އެވެ.
ކިޑްސަލް މުބާރާތް ރަސްމީކޮށް ހުޅުވީ މިއަދު ހަވީރު ރެހެންދި ޓާފް ފުޓްސަލް ދަނޑުގައި އޮތް ރަސްމިއްޔާތެއްގަ އެވެ. މި ރަސްމިއްޔާތުގެ ޝަރަފްވެރި މެހެމާނަކީ މައިލޯ މޯލްޑިވްސްގެ ދިޝާން އެވެ.
މިއަދުގެ ހާއްސަ ހަރަކާތުގައި ރަން މެޑަލް ހޯދި ރާއްޖޭގެ ގައުމީ ފުޓްސަލް ޓީމުގެ ބައެއް ކުޅުންތެރިން ވަނީ ބައިވެރިވެފަ އެވެ. އަދި، މުބާރާތުގައި ވާދަކުރާ 10 ޓީމުގެ ކުޅުންތެރިންނާއި މެނޭޖްމަންޓުން ވަނީ ހުޅުވުމުގެ ހަރަކާތަށް ގޮސްފަ އެވެ.
ހަރަކާތުގައި ވަނީ ކިޑްސަލްގެ ޓްރޮފީ އާއްމުކޮށްފަ އެވެ. ކިޑްސަލް ޓްރޮފީ ދައްކާލީ ރަން މެޑަލް ހޯދި ފުޓްސަލް ޓީމުގެ ތައްޓާ އެކު އެވެ.
ހަރަކާތުގައި ފުޓްސަލް ގައުމީ ޓީމުގެ ކުޅުންތެރިންގެ ހުނަރުތައް ދައްކާލާފައިވެ އެވެ.
ކްލަބް މޯލްޑިވްސް އިން ބާއްވާ ތާރީހީ މި މުބާރާތުގައި ވާދަކުރާ 10 ޓީމު ވަނީ ދެ ގްރޫޕަކަށް ބަހާލައިފަ އެވެ.
ގްރޫޕް އޭގައި ހިމެނެނީ ވެލެންސިއާ އާއި ބީޖީ ސްޕޯޓްސްގެ އިތުރުން ސްޓާސް އެކަޑެމީ އަދި އެލީޓް އެކެޑަމީގެ އިތުރުން ވިލިމާލެ ޔުނައިޓެޑެވެ. ގްރޫޕް ބީގައި ހިމެނެނީ ހުޅުމާލެ ޔޫތު ސްޕޯޓްސް އެކެޑަމީ އާއި ނިއު ރޭޑިއަންޓް ސްޕޯޓްސް ކްލަބުގެ އިތުރުން އެސްޕަޔާ އެކެޑަމީ އަދި އެޑްވެންޗާ އެކެޑަމީ އާއި ބިސްބުރު ސްޕޯޓްސް ކްލަބެވެ.
ކިޑްސަލްގެ މެޗުތައް ފަށާނީ އަންނަ އާދީއްތަ ދުވަހުގެ ރެ އެވެ.
ފުޓްސަލްގައި ރާއްޖެ ކުރިއަރަމުން އަންނައިރު ކުޑަކުދިންނަށް ފުޓްސަލްގެ ވާދަވެރި ބޮޑު މުބާރާތެއް ތައާރަފްކުރުމަކީ މި ކުޅިވަރުގައި ކުޅުންތެރިން ތަރައްގީކުރަން އެޅިގެންދާނެ މުހިއްމު ފިޔަވަޅެކެވެ.
ކިޑްސަލް ރަސްމީކޮށް ފެށިއިރު، ކްލަބް މޯލްޑިވްސް އިން މިއަހަރު ޖުމްލަ ހަތް މުބާރާތެއް ބާއްވާނެ އެވެ. މިހާރު ކުރިއަށްދަނީ ކިންގްސް ކަޕުގެ ގްރޫޕް ސްޓޭޖުގެ މެޗުތަކެވެ.
https://fahuminet.com/tournaments/kidsal-2026
ކްލަބް މޯލްޑިވްސްގެ މިއަހަރުގެ އޮންލައިން މީޑިއާ ޕާޓްނަރަކީ ފަހުމިނެޓް އެވެ.
